Многу делови од контроверзниот мировен план на американскиот претседател Доналд Трамп за Украина не можат да се спроведат без одобрение од европските сојузници на Киев, изјави францускиот претседател Емануел Макрон.
Зборувајќи на маргините на разговорите на Г20 во Јужноафриканската Република, Макрон рече дека предлозите како што се користењето на замрзнатите руски средства и пристапувањето на Украина во Европската унија можат да бидат одредени само од Европа.
„Замрзнатите средства ги држат Европејците. Европската интеграција на Украина е во рацете на Европејците. Она што го прави НАТО е во рацете на земјите членки на НАТО“, рече францускиот претседател, додавајќи дека американскиот план содржи многу аспекти што бараат поширока согласност, пренесува германската новинска агенција dpa.
Нагласи дека европските сојузници сакаат мир, но мир што ги зема предвид безбедносните интереси на Украина и остатокот од Европа.
Франција, Германија и Велика Британија се подготвени да извршат притисок врз САД да го ревидираат планот од 28 точки на состанокот во Женева во недела, откако предлогот, кој протече претходно оваа седмица, предизвика тревога во Киев и во Западна Европа, бидејќи ќе ѝ даде на Русија широки територијални и воени отстапки.
Според планот, минималната територија во источниот регион Донбас, која моментално е под украинска контрола, ќе ѝ биде отстапена на Русија, додека украинската армија драстично ќе биде намалена на 600.000 луѓе.
НАТО ќе биде должен да изјави дека алијансата нема дополнително да се шири, исклучувајќи го можното членство на Украина, што беше и една од главните причини за руската инвазија во февруари 2022 година. Русија, во меѓувреме, ќе мора да направи само мали отстапки, вклучително и откажување од дел од државниот имот замрзнат во ЕУ, кој ќе се користи за обнова на Украина.
Во замена за согласноста за овие отстапки, на Украина ѝ беа ветени неодредени безбедносни гаранции од Вашингтон. На Украина ќе ѝ биде дозволено и да се приклучи на Европската унија.
Слични новости
Мировниот договор за Украина е многу блиску, вели американскиот претставник Келог
Претставникот на американскиот претседател Доналд Трамп за Украина изјави дека договорот за завршување на војната во Украина е „многу блиску“ и дека сега зависи од решавањето на две главни отворени прашања – иднината на украинскиот регион Донбас и нуклеарната централа Запорожје
Кинески авиони насочиле воен радар кон јапонски авиони
Јапонија во неделата соопшти дека кинеските борбени авиони насочиле радар за контрола на оган кон јапонски воени авиони во два „опасни“ инциденти во близина на островската група Окинава во Јапонија, тврдење што Пекинг го негираше
САД престанаа да ја означуваат Русија како „диркента закана“, Кремљ е задоволен
Кремљ го поздрави потегот на администрацијата на американскиот претседател Доналд Трамп да ја ревидира својата стратегија за национална безбедност и да престане да ја нарекува Русија „директна закана“, изјави во неделата портпаролот Дмитриј Песков