Лига Европа: Манчестер Јунајтед го исфрли Сосиедад, Тотенхем подобар од АЗ

Тотенхем го надополни холандскиот пораз од 0:1 победувајќи го АЗ во Лондон со 3:1. Вилсон Одоберт постигна два гола (26, 74), а Џејмс Медисон еден (48), додека стрелец за гостите беше Пир Купмајнерс (63).

Спарс ќе игра против Ајнтрахт, кој го елиминира Ајакс со 2:1 и 4:1 победи.

По победата со 2:1 во Амстердам, Ајнтрахт беше уште поубедлив пред своите навивачи. Домашните поведоа во седмата минута од натпреварот со голот на Жан Матео Бахоја, а во 25. минута Марио Геце погоди за 2:0. Кога Хуго Екитике во 67. минута го постигна третиот гол за тимот од Франкфурт, сѐ беше јасно. Кенет Тејлор погоди во 78. минута, а конечните 4:1 ги постави Геце со својот втор гол на натпреварот во 82. минута.

Лацио се мачеше да ја мине Викторија Плзен, ремизирајќи 1:1 откако победи со 2:1 во првиот натпревар како гостински тим. Павел Шулц ги шокираше домашните навивачи во 52. минута, но Лацио израмни со голот на Алесио Ромањоли во 77. минута, што беше доволно за напредување. Следен противник за „небесно сините“ ќе биде Бодо/Глимт.

Норвежаните загубија од Олимпијакос со 1:2 во реваншот во Пиреја, бранејќи ја победата од 3:0 од првиот натпревар. Гостите поведоа во 36. минута со голот на Каспер Хог, но грчкиот тим го сврте резултатот со головите на Роман Јаремчук (53, 65). Олимпијакос имаше и пенал кој Родинеи го промаши во 62. минута. Во последните моменти од натпреварот домашниот тим остана со играч помалку откако беше исклучен Константинос Цолакис.

Бодо/Глимт стана првиот норвешки тим што стигнал до четвртфиналето на Купот на УЕФА/Лигата на Европа на УЕФА. Тоа им успеа пред три години, но во Конференциската лига каде беа запрени од Рома, која подоцна отиде до крај.

Атлетик Билбао, ја победи Рома со 3:1 на својот „Сан Мамес“, со што го надополни поразот од 1:2 во Рим. Еден од клучните моменти на натпреварот се случи во 11. минута кога гостинскиот дефанзивец Матс Хумелс „поцрвене“. Хумелс како последен дефанзивец го собори противничкиот играч кој изби сам пред шеснаесетникот, а судијата Клемент Турпин му го покажа патот до соблекувалната.

Домашниот тим ја искористи предноста од играч повеќе во судиското надополнување на првото полувреме со голот на Ница Вилијамс, пред погодокот на Јури Берчиче во 68. минута да ги донесе Баските на 2:0. На 3:0 зголеми Нико Вилијамс во 82. минута, а во последните моменти од мечот Леандро Паредес со гол од пенал го ублажи поразот на италијанскиот тим.

Првите натпревари се закажани за 10 април, а реваншите седум дена подоцна.