Кремљ го отфрли тврдењето на Трамп дека падот на цената на нафтата ќе помогне за завршување на конфликтот во Украина

Русија во петокот одговори на забелешките на американскиот претседател Доналд Трамп за војната во Украина, велејќи дека конфликтот е за националната безбедност, а не за цената на нафтата.

Портпаролот на Кремљ, Дмитриј Песков, рече дека прашањата за Русија во Украина се однесуваат на националната безбедност, заканите за Русите кои живеат таму и одбивањето на САД и Европа да ја слушнат загриженоста на Русија. „Овој конфликт не зависи од цените на нафтата“, рече тој, пренесе AFP.

Песков, исто така, рече дека рускиот претседател Владимир Путин е подготвен да разговара со неговиот американски колега Доналд Трамп, но дека чека „сигнали“ од Вашингтон.

Изјавата доаѓа ден откако Доналд Трамп, за време на обраќањето на Светскиот економски форум во швајцарскиот Давос, ги повика Саудиска Арабија и другите земји на Организацијата на земјите извознички на нафта (OPEC) да ги намалат цените на нафтата.

Во својот говор, Доналд Трамп посочи дека пониските цени на нафтата ќе помогнат да се стави крај на војната меѓу Русија и Украина.

„Исто така, ќе побарам од Саудиска Арабија и OPEC да ја намалат цената на нафтата. Мора да ја намалите, што, искрено, изненаден сум што не го направија тоа пред изборите. Ако цената се намали, руско-украинската војна веднаш ќе заврши“, рече Трамп во своето обраќање.

Доналд Трамп, исто така, тврдеше дека земјите на OPEC се, до одреден степен, одговорни за војната меѓу Украина и Русија.

„Во моментов, цената е доволно висока за војната да продолжи. Мора да ја спуштите цената на нафтата, мора да ставите крај на таа војна. Тие требаше да го направат тоа одамна. Тие се многу одговорни, до одреден степен, за тоа што се случува. Јас ќе барам каматите да се намалат веднаш, а исто така тие треба да се намалат низ целиот свет.

Игор Јушков, експерт од Финансискиот универзитет и Фондот за национална енергетска безбедност, за РИА Новости изјави дека со повикувањето на OPEC, Трамп во суштина сака да го искористи тоа за да ѝ достави ултиматум на Русија со цел да се стави крај на конфликтот во Украина.

Во исто време, тој истакна дека тоа би било неповолно за организацијата и не е јасно како Трамп ќе ги принуди земјите од OPEC да се согласат со неговите услови – освен ако тие исто така не се загрозени со санкции.

Во средата американскиот лидер веќе се закани дека ќе воведе нови санкции и давачки доколку Москва не ја прекине специјалната операција. Шефот на Белата куќа повика на итен прекин на конфликтот во Украина, предупредувајќи на можните негативни последици од продолжувањето на борбите.

Пoртпаролот на рускиот претседател Дмитриј Песков рече дека Русија не гледа ништо ново во овие закани. Тој потсети дека на Трамп често прибегнувал кон методите на санкции уште за време на неговиот прв претседателски мандат, но тој сè уште не испратил никакви сигнали за рамноправен дијалог, на кој Москва е подготвена.

globe

Слични новости