Коцевски: Од страна на Јавното обвинителство не протекуваат информации, немам податоци за локацијата на Груби

-Во тој поглед јас како државен обвинител можам да ви гарантирам дека од страна на ЈО не протекуваат никакви информации за тоа што тие предистраги, тие мерки за следење со месеци биле активни и претходно и ниедна не пробила. Акцијата е пробиена во завршна фаза односно ден два пред да се преземе официјално акцијата. Токму и на таа околност ЈО и сега истражува да дознае „кој е кртот“ на пробивање на акцијата, меѓутоа ете успеа два дена пред планираното да спроведе акција и дел од осомничените да ги уапси, посочи тој.

Во врска со бегството на Артан Груби, обвинителот Коцевски изјави дека Јавното обвинителство во моментов нема податоци каде се наоѓа осомничениот. Тој објасни дека пред неговото излегување од државата, ЈО имало ставено СТОП мерка до сите царински органи.

-Од она што го слушнавме од министерот, се работи за човечки фактор и начинот на кој што поминал го истражува МВР, рече Коцевски, додавајќи дека против надлежниот службеник и некои други лица е поднесена кривична пријава до Основното јавно обвинителство за организиран криминал, рече Коцевски во интервју за РСЕ.

Во врска со истрагата за влијанието на Груби во судскиот процес „Таргет – Тврдина“, Коцевски потврди дека како државен обвинител оформил предмет по допрен глас и дека обвинителството дало наредба да се прибават одредени докази.

-Првите дејства беа во Судскиот совет да се прибави предметот во однос на постапката против судијата кој беше ставен на црната листа и да се преземат сите други дејствија во однос на обезбедување докази. Со тоа што и понатаму предметот е прибавен со кој беше казнет судијата Беџети, но и понатаму се преземаат одредени дејства со издавање на наредби и ценам дека ќе оди во добар правец, посочи републичкиот обвинител.

За бегството на поранешниот директор на ЕСМ, Васко Ковачевски, Коцевски изјави дека Обвинителството за гонење организиран криминал утврдило дека може да се работи за дело со казна до пет години затвор и затоа не е одредена мерка притвор. Тој додаде дека во моментот на претресот, Ковачевски не бил во државата и дека сѐ уште нема официјално известување од МВР дали е достапен на државните органи.

Во однос на прашањето за пријавите против поранешниот премиер Димитар Ковачевски и поранешниот генерален секретар, Методија Димовски, Коцевски објасни дека Финансиската полиција и МВР поднеле кривични пријави до ОЈО Скопје, кои се споиле и дека јавниот обвинител кој го работел предметот оценил дека има доволно докази само за осомничените за кои повел истрага во случајот со „Државна лотарија“.

– За другите не е отфрлена кривичната пријава, што значи сѐ уште се истражуваат, а ако има елементи на кривично дело, ќе се постапи и за нив, посочи Коцевски.