Кина, Јапонија и Јужна Кореја планираат заеднички да одговорат на американските царини

Јапонија и Јужна Кореја бараат да увезуваат полупроводнички суровини од Кина, а Кина во исто време е заинтересирана за купување чипови од Јапонија и Јужна Кореја, објави корисникот Јујуан Тантиан на кинеската социјална мрежа Weibо, пишува Reuters.

Во објавата се наведува дека сите три страни се договориле да ја зајакнат соработката во синџирите на снабдување и повеќе да разговараат за контрола на извозот.

За време на состанокот во неделата, министрите се согласиле да „работат тесно заедно на сеопфатни дискусии на високо ниво“ за договорот за слободна трговија меѓу Јужна Кореја, Јапонија и Кина за промовирање на „регионалната и глобалната трговија“, се вели во соопштението објавено по состанокот.

Министрите се состанаа пред планираното соопштение на американскиот претседалте Доналд Трамп за дополнителни царини во среда, што тој го нарекува „ден на ослободувањето“, а истовремено менувајќи ги трговските партнерства на Вашингтон.

Пекинг, Сеул и Токио се главните трговски партнери на САД, иако тие беа во несогласувања меѓусебно за различни прашања, вклучително и територијални спорови и испуштањето на отпадните води од хаварисаната јапонска нуклеарна централа Фукушима.