Киев: Нема докази дека сме го нападнале резиденцијата на Путин

„Секако, нашите сојузници можат да потврдат дека тоа е лага благодарение на нивните технички способности“, додаде Зеленски за време на онлајн прес-конференција.

Москва во понеделник го обвини Киев дека користел 91 беспилотно летало за напад врз строго обезбедуваната резиденција Валдај на Владимир Путин, која се наоѓа помеѓу Москва и Санкт Петербург, во текот на ноќта од недела до понеделник. Украина веднаш ги негираше обвинувањата.

Порано во вторникот, украинскиот министер за надворешни работи Андриј Сибиха нагласи дека Москва „сè уште не доставила никакви убедливи докази“.

Извор близок до францускиот претседател Емануел Макрон изјави во вторник дека „нема цврсти докази, дури и по вкрстената проверка на информациите со нашите партнери“, дека Украина ја нападнала резиденцијата, објави АФП.

„Руските власти си противречат себеси за тоа што всушност се случило“, додаде истиот извор.

Кога станува збор за продолжување и интензивирање на руските воздушни напади, тие се „сами по себе чин на пркос на мировната агенда на претседателот Трамп“, заклучува истиот извор од кругот на францускиот претседател.

Новото зголемување на дипломатските тензии дојде кратко време по изјавите на САД и Украина што укажуваат на напредок во разговорите за договор што би можел да ја заврши руската инвазија на Украина.

Тврдењата фрлаат сомнеж врз продолжувањето на дипломатските напори што започнаа во ноември за да се стави крај на најсмртоносниот конфликт во Европа од Втората светска војна, бидејќи Москва сигнализираше дека ќе заземе поцврст став во разговорите за ставање крај на конфликтот.

Зеленски во вторник објави дека состанок со лидерите на сојузниците на Киев, таканаречената Коалиција на волјата, е закажан за 6 јануари во Франција, по состанокот во Украина на 3 јануари со советниците за безбедност од земјите што го поддржуваат Киев.