Италија: Околу 130 уапсени во голема полициска операција против сицилијанската мафија

Осомничените уапсени во вторникот се товарат за различни кривични дела, вклучувајќи трговија со дрога, обид за убиство, изнуда, нелегално коцкање преку Интернет и нелегално поседување огнено оружје, се вели во соопштението на полицијата. За 33 осомничени кои веќе беа во затвор за други кривични дела издадени се дополнителни потерници.

Истрагите открија дека мафијашките „фамилии“ на Палермо ги координираат своите активности во градот и околните провинции како во некогаш златните денови на „Коза Ностра“, особено кога станува збор за шверцот на дрога, соопшти полицијата, додавајќи дека „фамилиите“ од центарот на градот го повратиле авторитетот во споредба со годините во кои доминирала фракцијата од родното место на Корлеоне.

Модерните шефови користат модерна технологија за да ја завршат својата работа, користејќи шифрирани мобилни телефони прошверцувани во затворите за да им овозможат на затворените „кумови“ да продолжат да „работат“, велат истражителите.

Иако „Коза Ностра“ е ослабена од современите органи за спроведување на законот, организацијата продолжува да привлекува млади луѓе, велат карабинерите, наведувајќи го како пример документираниот случај на регрут кому постар соработник му давал „инструкции за мафијата“.

„Менторот“ на момчето „му даде конкретни упатства, учејќи го како треба да се однесува кон луѓето кои ќе бидат изложени на изнуда, а исто така го советуваше како да се однесува со главните мафијашки водачи“, се вели во полициското соопштение.

Италијанската премиерка Џорџа Мелони ги поздрави апсењата на Х, пишувајќи дека „На Коза Ностра ѝ е зададен многу тежок удар“ и дека апсењата „јасно сигнализираат дека борбата против мафијата не е и нема да запре“.