Инфлацијата во Русија остро забрзала во јануари

Домаќинствата проценуваат дека цените во јануари биле за 16,4 отсто повисоки во однос на истиот месец минатата година, а за 15,9 отсто во декември, пренесе агенцијата ТАСС, повикувајќи се на истражување спроведено за руската централна банка од компанијата ИнФОМ.

Во ноември и октомври, според согледувањата на домаќинствата, тие се зголемени за 13,4 отсто, а во септември за 12,5 отсто.

ИнФОМ го спроведе истражувањето од 14 до 23 јануари, анкетирајќи 2.000 испитаници во 55 руски региони, пишува ТАСС.

Руската економија забрза кон крајот на годината во услови на зголемени буџетски трошоци, забележа централната банка во својот билтен за февруари.

„Затоа личната потрошувачка остана на високо ниво, и покрај бавното кредитирање на домаќинствата и високата стапка на штедење“, додаваат тие.

Во такви услови цените нагло пораснаа, нагласуваат, пред сѐ поради тоа што капацитетите во индустријата и услужниот сектор повторно заостанаа зад побарувачката.

Снабдувањето беше попречено од санкциите, индексирањето на регулираните цени, таксите и тарифите и лошата жетва, што дополнително го поттикна растот на цените, напиша централната банка во билтенот, нагласувајќи го и слабеењето на рубљата во претходниот период.

Тие забележаа и дека инфлацијата обично е посилна во перцепцијата на граѓаните отколку во пресметките на статистичарите.

„Секој има своја лична кошница со стоки и услуги, а нашата проценка за нивното зголемување на цената обично се разликува од стапката на инфлација што Росстат ја базира на кошничката на просечното домаќинство“, додаваат тие.

На крајот од декември, банката ги задржа клучните каматни стапки на 21 отсто, проценувајќи дека инфлацијата треба да падне на целеното ниво од четири отсто во 2026 година.