Израел и Хамас договорија примирје во Газа и ослободување на заложниците

Спогодбата треба да ги запре борбите во Газа, да ја зголеми хуманитарната помош за палестинските цивили и повторно да ги соедини заложниците со нивните семејства по 15 месеци заложништво, изјави претседателот на САД Џо Бајден.

Израелскиот премиер Бенјамин Нетанјаху рече дека сеуште се работи на деталите од конечниот договор, а лидерот на Хамас Халил ал Хаџа порача дека спогодбата е производ на „палестинскиот отпор“. Многумина Палестинци и семејствата на израелските заложници ја прославија веста, но војната во Газа не престана.

Агенцијата за цивилна одбрана што ја води Хамас објави дека во израелските воздушни напади загинаа повеќе од 20 луѓе, по објавата дека е постигнат договор за примирје.

Нацрт договорот има неколку фази. Првата е шестонеделен прекин на огнот. За време на тој период Хамас треба да ослободи 33 заложници што ги зароби во нападот на 7 октомври 2023. Во замена за секој ослободен заложник Израел ќе ослободи десетици палестински затвореници.

Израел ќе ги повелече војниците од погусто населените делови во Појасот Газа во тампон зона на источната страна, на раселените Палестинци ќе им биде дозволено да почнат да се враќаат во своите домови, таму каде што не се уништени,  стотици камиони со хуманитарна помош би требало да влегуваат на палестинска територија секој ден.

Втората фаза во која треба да бидат ослободени преостанатите заложници, подразбра повлекување на израелските трупи и враќање кон „одржливо смирување на ситуацијата“ и би требало да почне на 16-от ден од примирјето. Третата и последна фаза ќе го означи почетокот на реконструкцијата на Газа што би можело да трае со години. Тогаш треба да се решат и клучните прашања за иднината на Газа, како што се кој ќе управува со неа и дали Израел целосно се повлекува.

Индиректните преговори се водат во Катар од мај 2024 и предлог примирјето е на маса веќе осум месеци.

„Прецизните контури на овој план ги изложив на 31 мај 2024. Тоа не е само резултат на екстремниот притисок врз Хамас и променетите регионални околности по прекинот на војната во Либан и слабеењето на Иран, туку и на упорна и макотрпна американска дипломатија. Мојата дипломатија никогаш не престана да вложува напори за да стигнеме до договор“, изјави Џо Бајден на конференцијата за медиуми по веста за примирјето.