Израелската војска објави дека погодила цели низ Газа рано во вторникот, завршувајќи го повеќенеделниот застој околу продолжувањето на примирјето што ги прекина борбите во јануари, при што палестинското Министерство за здравство објави најмалку 250 мртви.
Нападите беа пријавени на повеќе локации, вклучително и северна Газа и градовите Газа, Деир ал-Балах и Кан Јунис и Рафах во централниот и јужниот дел на Појасот Газа. Претставници на палестинското Министерство за здравство велат дека многу од жртвите се деца.
Израелската војска, која соопшти дека погодила десетици цели, рече дека нападите ќе траат онолку колку што е потребно и ќе се прошират надвор од воздушните напади.
Нападите беа многу поголеми од вообичаената серија напади со беспилотни летала извршени од израелската војска против поединци или мали групи осомничени милитанти, и доаѓаат по неколкунеделните неуспешни обиди да се преговара за продолжување на примирјето договорено на 19 јануари.
Хамас соопшти дека Израел го поништил договорот за прекин на огнот, оставајќи ја неизвесна судбината на 59-те заложници кои сѐ уште се држат во Газа.
Кабинетот на израелскиот премиер Бенјамин Нетанјаху го обвини Хамас дека упорно одбива да ги ослободи заложниците и ги отфрла предлозите на пратеникот на американскиот претседател Доналд Трамп за Блискиот исток, Стив Виткоф.
„Израел отсега ќе дејствува против Хамас со зголемена воена сила“, се вели во соопштението.
Во Вашингтон, портпаролот на Белата куќа рече дека Израел се консултирал со американската администрација пред да ги изврши нападите, за кои војската рече дека биле насочени кон командантите и водството на Хамас од средно ниво, како и инфраструктурата што наводно ѝ припаѓа на милитантната група.
Преговарачките тимови од Израел и Хамас се состанаа во Доха додека посредниците од Египет и Катар се обидоа да ги премостат разликите меѓу двете страни по завршувањето на почетната фаза на прекинот на огнот, при што милитантните групи од Газа ослободи 33 израелски заложници и пет Тајланѓани во замена за околу 2.000 палестински затвореници.
Со поддршка на Соединетите држави, Израел инсистираше на враќање на преостанатите 59 заложници кои сè уште се држат во Газа во замена за подолгорочен прекин на огнот што ќе ги запре борбите до крајот на светиот муслимански месец Рамазан и еврејскиот празник Пасха во април.
Сепак, Хамас побара преговорите да се фокусираат на траен крај на војната и целосно повлекување на израелските сили од Газа, во согласност со одредбите од првичниот договор за прекин на огнот.
„Бараме посредниците да ги сметаат Нетанјаху и ционистичката окупација целосно одговорни за прекршување и поништување на договорот“, рече Хамас.
Двете страни меѓусебно се обвинуваат дека не ги почитуваат условите од јануарскиот прекин на огнот, со бројни тешкотии во првата фаза. И покрај ова, досега беше избегнато целосно враќање на конфликтот.
Израел ја блокираше испораката на помош за Газа и се закани дека ќе продолжи со борбите доколку Хамас не се согласи да ги врати заложниците што сè уште ги држи.
Војската не објави детали за нападите извршени во раните утрински часови во вторникот, но палестинските здравствени власти и сведоците со кои контактирал Reuters објавија штета во бројни области на Газа, каде што стотици илјади луѓе живеат во импровизирани засолништа или оштетени згради.
Голем дел од Газа сега е во урнатини по 15 месеци конфликт, кој избувна на 7 октомври 2023 година, кога илјадници вооружени лица предводени од Хамас ги нападнаа израелските заедници околу Појасот Газа, убивајќи околу 1.200 луѓе и зедоа 251 заложници, според израелските податоци.
Одговорот на израелската војска резултираше со смрт на повеќе од 48.000 луѓе, според палестинските здравствени власти, и уништи голем дел од становите и инфраструктурата на енклавата, вклучително и болничкиот систем.
Слични новости
Трамп повтори дека го сака Гренланд, Венс ја повика Данска дa не инвестира во безбедноста на островот
Претседателот Доналд Трамп во петокот повтори дека сака да го присоедини Гренланд кон САД, тврдејќи дека тоа е многу важно за меѓународната безбедност, додека неговиот потпретседател ЏејДи Венс ја повика Данска да не инвестира во безбедноста на островот тврдејќи дека би му било подобо под „безбедносниот чадор“ на САД
Гутереш го отфрли предлогот на Путин ОН да управуваат со Украина
Генералниот секретар на Обединетите нации, Антонио Гутереш не гледа потреба од нови избори во Украина под надзор на Обединетите нации, отфрлајќи го предлогот на рускиот претседател Владимир Путин
ЏејДи Венс слета на Гренланд и покрај негодувањата
Американскиот потпретседател ЏејДи Венс слета во петокот на Гренланд додека претседателот Доналд Трамп продолжува да инсистира Вашингтон да ја преземе контролата врз полуавтономната данска територија