Нацрт-закон со кој ќе се примени израелскиот закон за окупираната палестинска енклава Западен брег (на реката Јордан), потег што е еднаков на анексирање на територијата што Палестинците ја сакаат за своја држава, доби прелиминарно одобрение од израелскиот парламент во средата.
Гласањето е прво од четирите потребни за усвојување на законот и е темпирано да се совпадне со посетата на американскиот потпретседател ЏејДи Венс на Израел, еден месец откако претседателот Доналд Трамп изјави дека нема да дозволи Израел да го анексира Западниот брег.
Партијата Ликуд на премиерот Бенјамин Нетанјаху не го поддржа законот предложен од пратениците надвор од неговата владејачка коалиција. Тој беше усвоен со 25 гласа „за“ и 24 „против“ од вкупно 120 пратеници. Вториот закон на опозициската партија со кој се предлага анексијата на населбата Маале Адумим беше усвоен со 31 глас „за“ и 9 „против“.
Некои партии во коалицијата на Нетанјаху – Партијата на еврејската моќ на министерот за национална безбедност Итамар Бен-Гвир и фракцијата на религиозниот ционизам на министерот за финансии Безалел Смотрич – гласаа за законот, кој ќе мора да помине низ долга законска постапка пред конечно да биде усвоен.
Членовите на коалицијата на Нетанјаху со години бараат Израел формално да анектира делови од Западниот брег.
Израел тврди дека териториите освоени во војната во 1967 година не се законски окупирани бидејќи се наоѓаат на наводно спорно земјиште, додека Обединетите нации и најголемиот дел од меѓународната заедница ги сметаат за окупирани.
Во 2024 година највисокиот суд на Обединетите нации прогласи дека се нелегални окупацијата на палестинските територии од страна на Израел, вклучувајќи го и Западниот брег, како и изградбата на еврејски населби во областа.
Владата на Нетанјаху ја разгледуваше анексијата како можен одговор на потезите на голем број западни сојузници за признавање на палестинска држава во септември, но се чини дека се откажа од потегот по приговорот на Трамп.
Палестинската исламистичка група Хамас во соопштението од средата изјави дека гласањето за законот за Западниот врег и Маале Адумим го покажа „грдото лице на колонијалната окупација“.
Самиот Нетанјаху не беше експлицитен во врска со анексијата откако последното изборно ветување беше напуштено во 2020 година во корист на нормализирање на односите со Обединетите Арапски Емирати и Бахреин.
ОАЕ, најистакнатата арапска земја што воспостави врски со Израел според таканаречениот Авраамски договори што Трамп го постигна во својот прв мандат, минатиот месец предупреди дека анексијата на Западниот брег е црвена линија за државата од Персискиот залив.
Слични новости
Макрон по примерот на Трамп ѝ се закани со царини на Кина
Францускиот претседател Емануел Макрон изјави дека му се заканил на Пекинг со царини за време на посетата на Кина доколку не преземе мерки насочени кон намалување на растечкиот трговски суфицит со Европската унија
Мировниот договор за Украина е многу блиску, вели американскиот претставник Келог
Претставникот на американскиот претседател Доналд Трамп за Украина изјави дека договорот за завршување на војната во Украина е „многу блиску“ и дека сега зависи од решавањето на две главни отворени прашања – иднината на украинскиот регион Донбас и нуклеарната централа Запорожје
Кинески авиони насочиле воен радар кон јапонски авиони
Јапонија во неделата соопшти дека кинеските борбени авиони насочиле радар за контрола на оган кон јапонски воени авиони во два „опасни“ инциденти во близина на островската група Окинава во Јапонија, тврдење што Пекинг го негираше