Со 77 гласа Собранието денеска изгласа недоверба на Весна Дамева, член на Судски Совет. Според заклучокот, Дамева имала значителен придонес во загрозување на независноста, професионалноста и угледот на судството и судиите и придонела за падот на довербта на граѓаните кон судството. Воедно, се наведува дека таа ја занемарила и не ја извршувала својата функција во работата на Советот, а поради изгласаната недоверба, го губи легитимитетот да учествува и одлучува во работата на Судски совет.
Претходно на расправата, Ѓорѓија Сајкоски, пратеник од ВМРО-ДПМНЕ, истакна дека интерпелациите на пет членови на Судскиот совет се клучен момент во борбата за владеење на правото и довербата во институциите
„Ова е клучен момент во борбата за владеење на правото, за правдата и довербата во институциите и со овие поднесени интерпелации ние почитувани, не му судиме на судството. Со овие поднесени интерпелации ја детектираме одговорноста на оние коишто требало да бидат коректив, оние коишто требало да носат правда и коишто треба да воспостават она што требаше да биде судска власт“, рече тој.
Весна Дамева, образложувајќи го својот одговор, истакна дека изминатиот период континуирано, како што кажа, одредени луѓе од политиката се обидуваат да ја омаловажат, изнесувајќи невистини и небулози.
„Се спореше мојата стручност и компетентност, и на сето тоа не реагирав пред се да го зачувам угледот на Судскиот совет. Бев спремна дека вие политичарите ќе ги користите сите средства и начини да не девалвирате нас, носителите на судска власт, кои не ви одговараме. Не дојдов да се правдам и заштитам себе си, дојдов да застанам на страната на владеење на правото“, истакна Дамева, отфрлајќи ги наводите од интерпелацијата.
Оливер Спасовски, пратеник од СДСМ, го критикуваше начинот на кој што власта преку интерпелациите врши удар врз правосудниот систем.
„На членовите на Судскиот совет, одговорност може да утврдува само Судскиот совет, затоа, поднесените интерпелации како механизам за политичка контрола на Собранието над субјектите кои што ги кажав претходно е преседан и недозволен акт во една демократска држава“, рече Спасовски.
Тој најави дека пратеничката група на СДСМ нема да учествува во понатамошната расправа на собраниската седница.
Елми Азири од Алијанса за Албанците истакна дека, како што рече „Денеска се прави притисок да се дадат оставки затоа што некој не може да дочека да ги преземе работите во свои раце“.
Никола Мицковски од ВМРО-ДПМНЕ го критикуваше напуштањето на седницата од страна на СДСМ, истакнувајќи дека аргументите не се на нивна страна.
Талат Џафери, од ДУИ истакна дека денешниот дневен ред е двојна штета, прво за Судскиот совет, потоа за парламентарната демократија.
„Начинот на интерпелацијата, редоследот на образложението на интерпелацијата покажува дека овие пет лица ги имаат идентификувано како политички субјекти во мандатот во којшто се избрани“, рече Џафери.
Седницата продолжи со расправа за интерпелацијата на членот на Судски Совет, Павлина Црвенковска, а треба да се расправа и за интерпелациите на членовите Селим Адеми, Тања Чачарова-Илиевска и Миљазим Мустафа.
Слични новости
Претреси на повеќе локации низ државата поради сомнителни набавки на нафтени деривати
На локации во Скопје и низ државата во тек е акција на Одделот за субивање на организиран криминал и корупција во координација со Основното јавно обвинителство за гонење на организиран криминал и корупција
Собранието ја изгласа предлог-одлуката за објавување јавен конкурс за именување на членови на Програмскиот совет на МРТ
Собранието денеска во рамки на 38. седница ја изгласа предлог одлуката за објавување на јавен конкурс за именување на членови на Програмскиот Совет на Македонската радио телевизија, како и таа за именување на член на Државната комисија за одлучување во управна постапка од работен однос и инспекциски надзор во втор степен
ССМ најавува протести доколку Владата не ги зголеми платите
Сојузот на синдикати на Македонија најавува протести во април доколку не се постигне договор за зголемување на платите. Претседателот на ССМ Слободан Трендафилов денеска на прес-конференција најостро ги осуди политичките напади врз синдикатот и рече дека нема да дозволат работничката класа да се става во подредена положба.