Украинскиот претседател Володимир Зеленски и францускиот претседател Емануел Макрон се среќаваат во Париз во понеделник за да разговараат за воените потреби на Киев и соработката меѓу одбранбените индустрии на двете земји, при што украинскиот лидер исто така спомена дека „е во тек подготовка на голем договор“.
Како што објави Елисејската палата, целта е „француската извонредност во индустријата за оружје да се стави во служба на украинската одбрана“ и „да се овозможи стекнување на системи потребни за спротивставување на руската агресија“.
Француското претседателство посебно се фокусираше на „одбраната на украинскиот воздушен простор“, додека Володимир Зеленски во саботата го повтори својот повик за повеќе системи за воздушна одбрана по новите масовни руски воздушни напади врз неговата земја.
Францускиот претседател и неговиот колега ќе го започнат денот во воената воздухопловна база Вилакублеј, југозападно од главниот град.
На украинскиот претседател, кој минатиот месец потпиша писмо за намера за купување на 100 до 150 шведски борбени авиони „Gripen“, ќе му бидат претставени француски борбени авиони „Rafale“ и нивната опрема, како и системи за беспилотни летала и системот за воздушна одбрана SAMP-T од новата генерација.
Вториот треба да биде испорачан во Франција на почетокот на 2027 година. Системот има подобрени можности за пресретнување ракети во споредба со сегашниот систем SAMP-T, од кој еден е распореден во Украина.
„Работиме на испорака на неколку системи за воздушна одбрана, на зајакнување на нашите воздухопловни сили“, објави Володимир Зеленски во видео порака во петокот, додавајќи дека „се подготвува голем договор со Франција“ и дека е „сигурен дека тој ќе биде финализиран многу наскоро“. Тој го нарече „историски договор“.
Кон крајот на октомври, Макрон ја објави испораката – „во наредните денови“ – на противвоздушните ракети Астер што се користат за системот SAMP-T, како и дополнителни борбени авиони „Mirage 2000“. Киев веќе доби три од шесте ветени авиони.
Двајцата лидери ќе учествуваат во работата на француско-украинскиот форум за беспилотни летала во Елисејската палата во попладневните часови.
Оваа година, Киев планира да користи повеќе од 4,5 милиони беспилотни летала, кои се одговорни за 70 проценти од уништувањето на непријателската опрема на фронтовските линии. Земјата разви моќна производствена мрежа за оваа намена. Украина, исто така, користи беспилотни летала за соборување на беспилотните летала Шахед што се лансираат секоја вечер кон нејзина територија.
Емануел Макрон и Володимир Зеленски ќе го посетат и Мон Валериен, западно од Париз. Таму ќе го разгледаат седиштето на „мултинационалните сили за Украина“, кои Париз и Лондон ги подготвуваат за распоредување како дел од договорот за прекин на огнот и „безбедносните гаранции“ што треба да му се обезбедат на Киев.
Овој штаб е основан од „коалиција на добронамерните“, составена од 35 земји, вклучувајќи ја и Украина. Штабот е „оперативен“ и „подготвен да распореди сили денот по прекинот на огнот“, според француски извори.
Оваа деветта посета на украински лидер на Франција од почетокот на големата руска инвазија на неговата земја во февруари 2022 година, доаѓа во време кога Украина е потресена од корупциски скандал што резултираше со оставка на двајца министри.
Слични новости
Нетанјаху: Израел ќе остане во тампон-зоната во јужна Сирија
Израел има намера да остане во тампон-зоната во јужна Сирија, изјави премиерот Бенјамин Нетанјаху на состанокот со израелските амбасадори, според извештаите на локалните медиуми
Замир постави нова граница со Појасот Газа
Началникот на Генералштабот на израелската армија, Ејал Замир, изјави дека линијата до која се повлекоа израелските сили сега е новата граница меѓу Израел и палестинските територии
Индонезија се справува со последиците од поплавите во кои загинаа над 900 луѓе
Индонезија се справува со последиците од масовните лизгања на земјиштето и ненадејните поплави предизвикани од циклонот на островот Суматра минатата седмица, при што бројот на жртвите во неделата надмина 900 луѓе