Европските министри за надворешни работи во понеделник усвоија нови санкции против дванаесет физички и две правни лица поради хибридните активности на Русија.
Листата вклучува аналитичари за надворешна политика кои работат во институции, тинк-тенкови и универзитети поврзани со Кремљ, како и влијателни личности кои промовираат проруска пропаганда и теории на заговор за руската инвазија на Украина, како и наративи против Украина и НАТО. Некои од нив се поранешни воени или полициски службеници од Западна Европа.
Министрите за надворешни работи на ЕУ, исто така, воведоа санкции врз Меѓународното движење на русофилите за ширење дестабилизирачки наративи за руската влада, како и врз 142-от баталјон за електронско војување со седиште во Калининград, кој е одговорен за попречување на комуникациските системи со кратки бранови и спроведување електронско војување. Оваа организација е одговорна и за неодамнешните дефекти на GPS сигналот во неколку земји-членки.
На листата со санкции се вклучени и членови на руската воена разузнавачка агенција ГРУ, како и групата за сајбер закани „Кадет Близард“. Тие извршија сајбер напади врз владини организации во Украина, земјите од ЕУ и НАТО за да добијат чувствителни информации и да ја дестабилизираат нивната политичка ситуација.
Со најновата одлука, рестриктивните мерки поради дестабилизирачките активности на Русија сега се применуваат на 59 физички и 17 правни лица.
Министрите, исто така, санкционираа уште пет физички и четири правни лица за поддршка на руската флота во сенка. Меѓу нив се бизнисмени директно или индиректно поврзани со руските нафтени компании „Роснефт“ и „Лукоил“, кои обезбедуваат значаен извор на приходи за руската влада. Меѓу санкционираните правни лица се и превознички компании со седиште во Обединетите Арапски Емирати, Виетнам и Русија, чии танкери се дел од руската флота во сенка што Москва ја користи за да ја заобиколи забраната за извоз на нафта.
Слични новости
Фон дер Лајен: Европа не смее да зависи од туѓите ставови
Европа не смее да дозволи да биде одредена од туѓите погледи на светот, изјави во среда претседателката на Европската комисија, Урсула фон дер Лајен
ЕУ ја прекинува финансиската помош за Грузија
Европската унија не планира по 2025 да ја продолжи финансиската помош на Грузија, соопшти Европската комисија. Брисел изрази „сериозна загриженост“ во врска со скршнувањето од демократските принципи и кршењето на владеењето на правото во оваа кавкаска земја.
Трамп ја проширува забраната за влез во САД за странски државјани
Според наредбата објавена од Белата куќа, општата забрана сега ги опфаќа и граѓаните на Буркина Фасо, Лаос, Мали, Нигер, Сиера Леоне и Јужен Судан.