Европските министри за надворешни работи во понеделник усвоија нови санкции против дванаесет физички и две правни лица поради хибридните активности на Русија.
Листата вклучува аналитичари за надворешна политика кои работат во институции, тинк-тенкови и универзитети поврзани со Кремљ, како и влијателни личности кои промовираат проруска пропаганда и теории на заговор за руската инвазија на Украина, како и наративи против Украина и НАТО. Некои од нив се поранешни воени или полициски службеници од Западна Европа.
Министрите за надворешни работи на ЕУ, исто така, воведоа санкции врз Меѓународното движење на русофилите за ширење дестабилизирачки наративи за руската влада, како и врз 142-от баталјон за електронско војување со седиште во Калининград, кој е одговорен за попречување на комуникациските системи со кратки бранови и спроведување електронско војување. Оваа организација е одговорна и за неодамнешните дефекти на GPS сигналот во неколку земји-членки.
На листата со санкции се вклучени и членови на руската воена разузнавачка агенција ГРУ, како и групата за сајбер закани „Кадет Близард“. Тие извршија сајбер напади врз владини организации во Украина, земјите од ЕУ и НАТО за да добијат чувствителни информации и да ја дестабилизираат нивната политичка ситуација.
Со најновата одлука, рестриктивните мерки поради дестабилизирачките активности на Русија сега се применуваат на 59 физички и 17 правни лица.
Министрите, исто така, санкционираа уште пет физички и четири правни лица за поддршка на руската флота во сенка. Меѓу нив се бизнисмени директно или индиректно поврзани со руските нафтени компании „Роснефт“ и „Лукоил“, кои обезбедуваат значаен извор на приходи за руската влада. Меѓу санкционираните правни лица се и превознички компании со седиште во Обединетите Арапски Емирати, Виетнам и Русија, чии танкери се дел од руската флота во сенка што Москва ја користи за да ја заобиколи забраната за извоз на нафта.
Слични новости
Европски лидери: Мировници предводени од Европа да бидат вклучени во гаранциите за Украина
Одлуките за потенцијални украински територијални отстапки можат да ги донесат само народот на Украина и само откако ќе бидат воспоставени силни безбедносни гаранции, кои треба да вклучуваат мултинационални сили предводени од Европа, изјавија европските лидери во заедничка изјава по состанокот во Берлин во понеделник.
САД бараат од Украина повлекување од Доњецк доколку сака мир
Американските мировни преговарачи ѝ кажаа на Украина на разговорите во Берлин дека мора да се согласи да ги повлече своите сили од источен Донецк како дел од каков било договор за ставање крај на речиси четиригодишната војна, изјави функционер запознаен со ова прашање.
Германија претстави план од 10 точки за продлабочување на одбранбената соработка со Украина
За време на посетата на украинскиот претседател Володимир Зеленски на Берлин беше претставен план од 10 точки, кој предвидува Германија да ја продлабочи посветеноста на одбраната на Украина преку заеднички вложувања, понатамошна трговска интеграција и можности за гарантирање на инвестициите