Европската комисија предлага отворањето на преговарачките кластери и други меѓучекори во пристапните преговори да се одобруваат со квалификувано мнозинство, што би ја намалило можноста една членка сама да го блокира напредувањето на земја кандидат.
Ако биде прифатен, предлогот би можел да и го олесни европскиот пат и на Македонија, која со години се соочува со пречки поврзани со билатерални спорови.
Еврокомесарката за проширување Марта Кос го претстави пакетот „Подготовка за поширока Унија” на прес-конференција во Стразбур, во вторникот, на 6 октомври, по неговото усвојување од Европската комисија.
Пакетот ги опфаќа предложените промени во одлучувањето за пристапните преговори, постепената интеграција на кандидатите и подготовката на институциите, политиките и буџетот на ЕУ за идните проширувања.
За Македонија, најзначајна е можноста одлуките во опфатените фази на преговорите да се носат без согласност од секоја членка поединечно. Тоа би го ограничило просторот за поединечни блокади, но напредувањето и натаму би зависело од исполнувањето на условите и од обезбедувањето на потребното мнозинство.
Предлогот за поинакво гласање не ја отстранува обврската Македонија да ги спроведе договорените уставни измени. Во заклучоците на Советот на ЕУ од јули 2022 година, одржувањето на следната меѓувладина конференција е врзано за исполнувањето на таа обврска, која го опфаќа и внесувањето на Бугарите во Уставот.
Слични новости
Остри критики на адреса на Фондот по одлуката за проверка на боледувањата
Дел од лекарската фела со остри критики на адреса на Фондот, по најавите за намалување на деновите за боледување од 7 на 5. Велат, времетраењето треба да го диктира дијгнозата, а не административни протоколи.
ЕСМ платила милиони за набавки што не ги користела констатира ДЗР
Се правеле набавки кои не се користеле, се склучувале договори со само една понуда, се ограничувала конкуренцијата, се вели во извештајот на Државниот завод за ревизија за работењето на ЕСМ.
Мултифондови за похрабро инвестирање и повисоки приноси наместо укинување на вториот пензиски столб
Парите од вториот пензиски столб не се оплодуваат доволно, но решението не е во укинување на вториот столб, туку во негова реконструкција. Пензиските друштва го гледаат решението во законски измени кои ќе овозможат похрабро, но и поризично инвестирање на пензиските заштеди, кои ќе носат и повисоки приноси.