Европската комисија на Урсула фон дер Лајен во петокот ги отфрли критиките на сметка на Европската унија во новиот американски документ во кој се опишува стратегијата за националната безбедност, а истовремено започнаа првите реакции меѓу европските политичари.
Во стратегијата објавена во четвртокот, Вашингтон ја критикува ЕУ и ги повторува тврдењата на крајната десница дека континентот е загрозен од „цивилизациска ерозија“ поради имиграцијата. Документот предвидува дека во рок од неколку децении членките на НАТО ќе станат „претежно неевропски“ и ја критикува „цензурата на слободата на говорот и угнетувањето на политичката опозиција“ во земјите членки на Евроспката унија.
Портпаролката на Комисијата, Паула Пињо, во петокот негираше дека ЕУ ги поткопува политичките слободи и суверенитетот, му штети на континентот со своите миграциски политики и ја загрозува слободата на изразување. Португалката одби да коментира натаму за американскиот документ, велејќи дека „немало доволно време целосно да се процени“.
Германскиот министер за надворешни работи, Јохан Вадефул, во првата реакција на американскиот документ рече дека „на Европа не ѝ е потребен совет однадвор“.
„Сметаме дека сме способни да разговараме за овие прашања целосно независно во иднина и не ни е потребен совет однадвор“, рече Вадефул додавајќи дека дополнително ќе ја проучи стратегијата на САД.
Валери Aје, француската претседателка на либералите во Европскиот парламент, исто така реагираше на документот, нарекувајќи го „неприфатлив и опасен“, објави AFP.
„Администрацијата на Трамп нема право да се меша во нашата внатрешна политика“, напиша таа на платформата X. Aје верува дека сегашната американска администрација е „непријател на Европа“ и дека ЕУ треба да престане да се однесува кон неа како кон „пријател“.
Нејзината партиска колешка Натали Лоазо, потпретседателка на парламентарниот комитет за надворешни работи, ја повика Европа „да не прифаќа да ѝ се држат лекции“.
„Нема друг одговор освен создавање услови за вистинска стратешка автономија и градење силна Европа што нема да дозволи никому да ги диктира одлуките на нејзиното општество“, изјави Лоазо за француската новинска агенција.
Во документот на Вашингтон се посочува дека „големите проблеми со кои се соочува Европа“ вклучуваат „активности на ЕУ и други транснационални тела што ги поткопуваат политичките слободи и суверенитет“, „политики за мигранти што го трансформираат континентот“ и „цензура на слободата на говорот и угнетување на политичката опозиција“, како и „ниски стапки на наталитет и губење на националните идентитети и самодовербата“.
Во американската стратегија, исто така, се тврди дека огромното мнозинство Европејци сакаат мир, но дека оваа желба не се одразува во политиката бидејќи националните влади ги поткопуваат демократските процеси, пишува германската новинска агенција dpa.
Трамп го опиша документот од 33 страници во кој се наведува стратегијата за национална безбедност на Америка како „план“ што гарантира дека САД ќе останат „најголемата и најуспешната нација во човечката историја“.
Слични новости
Мировниот договор за Украина е многу блиску, вели американскиот претставник Келог
Претставникот на американскиот претседател Доналд Трамп за Украина изјави дека договорот за завршување на војната во Украина е „многу блиску“ и дека сега зависи од решавањето на две главни отворени прашања – иднината на украинскиот регион Донбас и нуклеарната централа Запорожје
Кинески авиони насочиле воен радар кон јапонски авиони
Јапонија во неделата соопшти дека кинеските борбени авиони насочиле радар за контрола на оган кон јапонски воени авиони во два „опасни“ инциденти во близина на островската група Окинава во Јапонија, тврдење што Пекинг го негираше
САД престанаа да ја означуваат Русија како „диркента закана“, Кремљ е задоволен
Кремљ го поздрави потегот на администрацијата на американскиот претседател Доналд Трамп да ја ревидира својата стратегија за национална безбедност и да престане да ја нарекува Русија „директна закана“, изјави во неделата портпаролот Дмитриј Песков