Десетина европски лидери во неделата ќе одржат вонреден самит во Лондон за да ја подобрат безбедносната соработка и да обезбедат поголема поддршка за Украина, по драматичниот судир меѓу Киев и Вашингтон кој изненади многумина, пренесува AFP.
Сојузниците на Украина ја нагласуваат цврстата посветеност на одбраната на Украина поради загриженоста дека американскиот претседател Доналд Трамп би можел да го разочара Киев во преговорите со Русија.
Ден откако доживеа бурно испраќање од Белата куќа, украинскиот претседател Володимир Зеленски пристигна во Лондон во саботата, каде што беше срдечно пречекан од британскиот премиер Кир Стармер на Даунинг стрит.
Двајцата лидери се прегрнаа пред камерите, а Зеленски обезбеди заем од 2,74 милијарди евра што треба да ѝ помогне на Украина да ја зајакне својата одбрана, исцрпена по повеќе од три години борба против руската инвазија.
„Благодарам на народот и владата на Обединетото Кралство за вашата неверојатна поддршка од првиот ден на оваа војна. Ние сме среќни што имаме такви стратешки партнери со кои ја споделуваме визијата за сигурна иднина за сите“, рече Зеленски.
Во недела, Зеленски ќе се сретне со кралот Чарлс III, а потоа ќе им се придружи на европските сојузници на самитот за безбедност. На состанокот ќе учествуваат лидери од неколку европски земји, меѓу кои Франција, Германија, Данска, Италија и Турција, заедно со претставници на НАТО и на Европската унија.
„Сега е време да се обединиме за да обезбедиме најдобар исход за Украина, да ја заштитиме европската безбедност и да ја обезбедиме нашата заедничка иднина“, рече британскиот премиер Кир Стармер.
Даунинг стрит вели дека самитот ќе ја нагласи потребата од „силен и долгорочен договор кој носи траен мир“ и ќе разговара за следните чекори за безбедносни гаранции.
Со оглед на зголемените стравувања за континуираната американска поддршка за НАТО, овој собир ќе се осврне и на потребата Европа да ја зајакне сопствената одбранбена соработка.
Додека конвојот на Зеленски влезе во Лондон во саботата, толпи поддржувачи го поздравија.
„Многу си добредојден овде во Даунинг стрит“, му рече Стармер пред нивниот 75-минутен разговор зад затворени врати.
Тие разговараа за позицијата на Украина и како да се стави крај на војната со „траен и праведен мир што нема да и дозволи на Русија да го искористи прекинот на огнот за да вооружува и повторно да нападне“, се вели во соопштението од кабинетот на украинскиот претседател.
Тандемот, исто така, претстави заем од 2,26 милијарди фунти за зајакнување на одбраната на Украина, кој ќе се финансира со профит од замрзнати руски средства.
„Парите ќе одат за производство на оружје во Украина. Тоа е вистинска правда. Кој ја започна војната мора да плати“, рече Зеленски.
Слични новости
Канада им возвраќа на САД со царини од 29,8 милијарди долари
Канада ќе им воведе на САД царини во вредност од 29,8 милијарди канадски долари почнувајќи од четврток наутро како одговор на царините што ги воведе Вашингтон за челик и алуминиум, изјави канадскиот министер за финансии Доминик Лебланк
Трамп добил „позитивни пораки“ од Москва за примирјето во Украина
Американскиот претседател Доналд Трамп во средата изјави дека американски официјални претставници се упатуваат во Русија на разговори за американско-украинскиот договор за 30-дневен прекин на огнот и за патот кон мировните преговори
На самитот на Г7 нема да разговара за американското „преземање“ на Канада, вели Рубио
Американскиот државен секретар Марко Рубио во средата изјави дека на состанокот на министрите за надворешни работи на земјите од групата Г7, планиран да се одржи во четврток во Канада, нема да се разговара за „преземањето на Канада“ од страна на САД, како што повеќепати споменуваше американскиот претседател Доналд Трамп