Цените на акциите благо пораснаа на европските берзи во четвртокот претпладнето, втор ден по ред, бидејќи инвеститорите очекуваат Европската централна банка (ECB) да ги намали каматните стапки на својата редовна седница.
Индексот STOXX 600 на водечките европски акции во првиот пресек од тргувањето порасна за 0,2 отсто, зајакнувајќи втор ден по ред. Истовремено, лондонскиот FTSE индекс зајакна за 0,08 отсто, на 8.308 поени, додека франкфуртски DAX се зголеми за 0,20 отсто, на 20.440 поени, а париски CAC за 0,38 отсто, на 7.450 поени.
Во фокусот на инвеститорите ќе биде средбата на лидерите на Европската централна банка, а повеќето аналитичари очекуваат намалување на клучните каматни стапки за 0,25 процентни поени, а некои и за 0,50 поени. Дополнително, ECB ќе објавува квартални макроекономски прогнози за инфлацијата и економскиот раст.
Денеска седница ќе одржат и челниците на швајцарската централна банка, а се очекува и намалување на каматните стапки.
Цените на акциите пораснаа и на повеќето азиски берзи. Индексот MSCI на азиско-пацифичките акции порасна за 0,8 отсто во истиот временски пресек како и во Европа. Истовремено, на токиската берза индексот Nikkei зајакна за 1,2 отсто, додека цените на акциите во Шангај, Јужна Кореја и Хонгконг пораснаа меѓу 0,8 и 1,6 отсто. Во Австралија, пак, паднаа за 0,3 отсто.
Така, азиските берзански индекси го следат вчерашниот раст на Волстрит, каде индексот S&P 500 достигна ново рекордно ниво, како и Nasdaq. Тоа најмногу се должи на растот на цените на акциите на технолошките гиганти. Од т.н „Седумте величествени“ компании, цените на акциите на четири од нив вчера достигнаа рекордни нивоа – „Alphabet“, „Tesla“, „Meta Platforms“ и „Amazon“.
Во фокусот на инвеститорите беше и извештајот за потрошувачките цени во САД, кој покажа дека инфлацијата во ноември очекувано пораснала на 2,7 отсто на годишна основа, додека еден месец претходно била 2,6 отсто. Иако инфлацијата сѐ уште се движи далеку над целното ниво на американската централна банка од 2 отсто, пазарот очекува Fed да ги намали каматните стапки по трет пат оваа година, за дополнителни 0,25 процентни поени, на дводневниот состанок од 17. до 18. декември.
Слични новости
Цените на храната значително пораснаа во февруари
Цените на храната драстично се зголемија во февруари првпат од есента минатата година, како одраз на повисоките цени на шеќерот, млекото и млечните производи и растителните масла, објави во петокот агенцијата за храна при Обединетите нации
Нафтата поскапе кон 71 долар
Цените на нафтата пораснаа до 71 долар на меѓународните пазари во петокот, откако руски функционер навести дека водечките производители би можеле да го преиспитаат планираното зголемување на понудата
Димитриеска Кочоска: Македонската економија веќе не е во стагнација
Веќе почнуваат да се гледаат и видливи се резултатите од нашата работа. Економијата во Македонија повеќе не е во стагнација, оцени министерката за финансии Гордана Димитриеска – Кочоска, осврнувајќи се на податоците што денеска ги објави Државниот завод за статистика за невработеноста, индустриското производство и извозот.