Евролига: Ѕвезда поразена дома од Ефес, но оди во Топ 10 со помош на Виртус

Црвена ѕвезда во драматична завршница на домашен терен во продолжението беше поразена од Анадолу Ефес со 96:97. Без оглед на ваквиот исход, шампионот на АБА-лигата обезбеди пласман во Топ 10 и учество во плејин натпреварувањето, благодарејќи на поразот на Олимпија Милано.

„Црвено-белите“ одиграа одлично прво полувреме, но Ефес се врати во вториот дел, имајќи целосна контрола над резултатот. Гостите предводени од Кенан не се предадоа, успеаја да се приближат, а потоа со положувањето на Јаго и да го одведат мечот во дополнителни пет минути. Ефес беше подобар ривал и во овој период од мечот, но карактерот на домашниот тим помогна Црвена Звезда со тројката на Милер Мекинтаер да дојде на само „минус еден“, а потоа и да го има последниот напад на мечот. Сепак, истиот кошаркар ја презеде одговорноста, но не беше прецизен при победничкиот шут, па Анадолу Ефес по вторпат за петнаесетина дена успеа да стигне до триумф во преполна сала во Белград.

Брајант постигна 17, а Поарие имаше 14 поени за турскиот тим, за кој мора да се истакне дека во третата четвртина остана без Бобуа, кој поради тешка повреда во количка беше изнесен кон соблекувалните. Петрушев со 23 и Кенан со 21 поен беа најефикасни во таборот на Црвена ѕвезда.

Олимпијакос ја прекина серијата од три пораза, славејќи на гостувањето против Алба со 92:100, за враќање на првото место на табелата. „Црвено-белите“ од Атина имаа 18 поени предност во втората четвртина (28-46), но Алба не само што се врати, туку и стигна до предност во последната четвртина. Сепак, грчкиот гигант во своите редови го имаше феноменалниот Питерс, кој погоди осум тројки од девет обиди, постигнувајќи вкупно 33 поени со што беше најзаслужен за оваа победа.

Олимпија Милано ги загуби сите шанси за пласман во плејин натпреварувањето откако тимот на македонскиот репрезентативец Ненад Димитријевиќ беше убедливо поразен во италијанската пресметка со Виртус Болоња (90:70). Димитриевиќ воопшто не беше во составот, а неговите соиграчи беа декласирани на теренот од противникот кој немаше никакви шанси за доигрувањето, но сепак одигра максимално мотивирано и заслужено стигна до победата.

Морган со 16 и Шенгелија со 14 поени ги предводеа стрелците во победничкиот тим, кај Милано најефикасен беше Лидеј со 19 поени, додека Шилдс заработи незгодна повреда и воопшто не се враќаше во игра во второто полувреме.

Најлесно од сите до победата вечерва стигнаа кошаркарите на Басконија, на домашен терен декласирајќи го составот на Асвел со преубедливи 111-75. Хауард со 25 и Монеке со 14 поени беа најефикасни во таборот на Басконија, додека прв стрелец на Асвел во овој убедлив пораз беше Ажинса со 16 поени.

Во нокаут-фазата на Евролигата се пласираа Олимпијакос, Фенербахче, Панатинаикос, Монако, Анадолу Ефес, Баерн Минхен, Реал Мадрид, Барселона, Црвена ѕвезда и Париз.

globe

Слични новости

Томас Милер по 25 години минати во Баерн Минхен заминува од клубот

Томас Милер по 25 години минати во Баерн Минхен заминува од клубот

Во текот на неговата кариера со тимот, Милер стана германски шампион 12 пати, двапати ја освои Лигата на шампионите, Светското клупско првенство и Суперкупот на УЕФА, шест пати германскиот куп и осум пати германскиот Суперкуп.