Доларот ослабе во однос на кошничката валути, еврото зајакна

По трите недели раст во кои достигна највисоки нивоа во последните две години, индексот на доларот драстично падна минатата недела.

Американската валута најмногу ослабе во однос на јапонската, што е последица на растот на инфлацијата во Јапонија, поради што се засилија шпекулациите дека јапонската централна банка овој месец би можела да ги зголеми каматните стапки.

Од друга страна, еврото зајакна по пораката на Европската централна банка (ECB) дека може да го забави темпото на намалување на каматните стапки.

Минатата недела инвеститорите се фокусираа на новите макроекономски податоци од САД, кои покажаа дека економијата продолжува да расте, а пазарот на трудот е солиден. Тоа значи дека американската централна банка не треба да брза со намалување на каматните стапки

Дотолку повеќе што новите податоци покажаа дека инфлацијата не се намалува толку брзо како што се надеваа инвеститорите, па се уште се движи над целните нивоа на Fed од 2 отсто. Поради сето ова, шпекулациите дека Fed ќе продолжи со агресивно намалување на каматните стапки стивнаа.

Мора да се признае, пазарот сè уште очекува Fed да ги намали каматните стапки за 0,25 процентни поени на состанокот во декември, но надежите дека ќе ги намали каматните стапки во јануари и март следната година исчезнаа.