Доларот зајакна во однос на кошницата валути, еврото под притисок

Еврото се најде под притисок во петокот, бидејќи судирот меѓу американскиот претседател Доналд Трамп и украинскиот претседател Володимир Зеленски на состанокот во Вашингтон ги намали надежите дека наскоро ќе започнат мировните преговори меѓу Русија и Украина. Зеленски ја напушти Белата куќа набргу по средбата и не потпиша договор со САД за заедничко ископување на ретки метали.

„Разговорите за мировните преговори меѓу Русија и Украина се чинеше дека постигнуваат напредок, но во петокот тие надежи нагло беа уништени. Но, тоа е само една од бројните несигурности што тежат на пазарот“, вели Џек Мекинтајр, менаџер на портфолио во „Brandywine Global“.

Заканите на Трамп за царини, исто така, придонесуваат за несигурноста на пазарот. Тој најави дека царините за увоз од Канада и Мексико, како и дополнителни 10 отсто царини за увоз од Кина, сепак ќе стапат на сила следната седмица.

Трамп рече и дека наскоро би можел да воведе царини од 25 отсто за увозот од Европската унија, а бидејќи Европската комисија најави брз и решителен одговор, инвеститорите стравуваат од тарифна војна, која може негативно да влијае на растот на целата светска економија.

И поради ова, сè појасно е дека американската централна банка нема да продолжи да ги намалува каматните стапки во скоро време, иако серија неодамнешни макроекономски податоци укажуваат на забавување на растот на најголемата светска економија. Имено, челниците на Fed продолжуваат да велат дека инфлацијата се уште е над целното ниво од 2 отсто и дека чекаат индикации како политиките на Трамп, особено царините, ќе влијаат на економијата и на инфлацијата.