Документите откриваат разлики во ставовите за мировниот план во Украина

Првиот текст ги одразува предлозите што ги доставил претставникот на американскиот претседател Доналд Трамп, Стив Виткоф, до европските претставници во Париз, кои потоа им биле пренесени на Украинците, според извори блиски до разговорите. Американскиот државен секретар Марко Рубио ги опиша предлозите како „широка рамка“ за идентификување на разликите во мислењата меѓу страните.

Вториот текст е резултат на разговорите меѓу украинските и европските претставници во Лондон една седмица подоцна и ѝ бил предаден на американската страна, велат изворите.

Украинскиот претседател Володимир Зеленски во четвртокот изјави дека смета оти документ со предлози што произлегоа од разговорите во среда во Лондон сега е на масата на Трамп.

Кога станува збор за територија, предлозите на Виткоф бараат де јуре признавање од страна на САД на руската контрола врз Крим, кој Русија го анектираше во 2014 година, и де факто признавање на руските окупации на јужна и источна Украина, пишува Reuters.

Од друга страна, европскиот и украинскиот документ предвидува детални дискусии за територијата дури откако ќе се постигне договор за прекин на огнот, без да се спомене признавањето на руската контрола врз кој и да е дел од украинската територија.

Кога станува збор за долгорочната безбедност на Украина, во документот на Виткоф се наведува дека Украина ќе има „цврста безбедносна гаранција“ и дека европските и другите пријателски земји ќе дејствуваат како гаранти. Тој не навлегува во детали за ова, но нагласува дека Киев нема да бара членство во НАТО.

Вториот документ е попрецизен, во кој се наведува дека нема да има ограничувања за украинските сили, ниту ограничувања за сојузниците на Украина да ги стационираат своите воени сили на украинска територија, што веројатно нема да ѝ се допадне на Москва.

Тој предлага силни безбедносни гаранции за Киев, вклучително и од САД, со „договор во стилот на Член 5“, што се однесува на Северноатлантскиот договор со кој е основан НАТО. Според тој член, напад врз една членка на НАТО е напад врз сите нив.

Во однос на економските мерки, предлозите на Виткоф наведуваат дека санкциите воведени врз Русија откако го анектираше Крим во 2014 година ќе бидат укинати како дел од договорот за којшто се разговара.

Контрапредлозите предвидуваат „постепено ублажување на санкциите откако ќе се постигне одржлив мир“ и дека санкциите би можеле повторно да се воведат доколку Русија ги прекрши условите на мировниот договор.

Европскиот и украинскиот документ, исто така, предвидуваат Украина да добие финансиска компензација за воена штета од замрзнатите руски средства во странство. Во текстот на Виткоф се наведува само дека Украина ќе добие финансиска компензација, без да се наведува изворот на парите.