На самиот почеток од тргувањето во четвртокот, берзанските индекси силно пораснаа на њујоршки Волстрит, благодарение на добрите деловни резултати од „Nvidia“, но следеше голем пресврт, па индексите завршија со тргување длабоко во минус.
Индексот Dow Jones се лизна за 0,84 отсто, на 45.752 поени, додека S&P 500 потона за 1,56 проценти, на 6.538 поени, а индексот Nasdaq за дури 2,15 отсто, на 22.078 поени.
На самиот почеток од тргувањето, индексот S&P 500 порасна за речиси 2 отсто, бидејќи инвеститорите беа убедени дека подобрите од очекуваните деловни резултати на „Nvidia“ ги отфрлија стравувањата од претерано високи цени на акциите за технолошките компании.
Технолошкиот сектор значително порасна, а цената на акциите на „Nvidia“ скокна за дури 5 отсто. Но, потоа дојде ненадеен пресврт, при што берзанските индекси ги загубија сите свои почетни добивки и завршија длабоко на негативна територија. Цената на „Nvidia“ заврши со пад од повеќе од 3 отсто. Цените на акциите на другите производители на чипови исто така остро паднаа, при што индексот на секторот се намали за речиси 5 отсто.
Индексите S&P 500 и Nasdaq паднаа на најниските нивоа за повеќе од два месеца. Од друга страна, индексот на страв VIX на Чикашката берза за опции достигна највисоко ниво од април, кога пазарот беше потресен од најавата за драстично зголемување на царините за увоз во САД.
Технолошкиот сектор долго време расте силно, благодарение на еуфоријата околу развојот на вештачката интелигенција, но последните седмици инвеститорите се загрижени за високите цени на технолошките акции и огромните инвестиции во секторот, кои нема да се исплатат сите.
Пазарот вчера беше негативно погоден и од извештајот за вработувањето, кој покажа дека бројот на вработени во септември се зголемил повеќе отколку што очекуваа аналитичарите. Тоа ги намали очекувањата дека американската централна банка дополнително ќе ги намали каматните стапки во декември. До неодамна се проценуваше дека има околу 90 отсто шанси дека Федералните резерви ќе го сторат тоа, но сега шансите се само околу 40 отсто.
Единствената светла точка вчера беше „Walmart“, кој објави подобри од очекуваните деловни резултати и ги зголеми своите деловни проценки за остатокот од годината. Цената на акциите на најголемиот американски малопродажен синџир скокна за повеќе од 6 отсто, а индексот на малопродажниот сектор порасна за повеќе од 1 отсто. Овој сектор беше единствениот добитник меѓу 11-те најважни сектори на индексот S&P 500 вчера.
А на европските берзи, цените на акциите пораснаа вчера. Лондонскиот индекс FTSE зајакна за 0,21 отсто, на 9.527 поени, додека Франкфуртскиот DAX порасна за 0,50 отсто, на 23.278 поени, а парискиот CAC за 0,34 отсто, на 7.981 поен.
Слични новости
„Аmazon“ со уплата од 180 милиони евра ја затвори истрагата за можна дночна измама во Италија
Подружница на американскиот гигант за е-трговија „Amazon“ им плати околу 180 милиони евра на италијанските даночни власти и го укина својот систем за следење на испораките со цел да ја затвори истрагата за можна даночна измама и експлоатација на работници
Цените на храната паднаа и во ноември
Цените на храната паднаа и во ноември, трет месец по ред, со значително намалување на цената на млекото и млечните производи и растителните масла, објави во петокот агенцијата за храна и земјоделство на Обединетите нации
РКЕ ги намали надоместоците за дистрибуција, пренос и за операторот на пазарот на електрична енергија
Регулаторната комисија за енергетика (РКЕ) за 3,64 отсто го намали надоместокот за дистрибуција на електрична енергија, односно за користење на електродистрибутивниот систем на Електродистрибуција од 1 јануари 2026 година