„Deutsche Post“ во четвртокот објави дека ќе отпушти 8.000 работници до крајот на годината за да ги намали трошоците, по скромниот раст на приходите на матичната групација DHL во 2024 година.
Отпуштањата опфаќаат околу четири отсто од вкупните 187.000 работници во одделот за поштенски услуги во нејзината матична земја Германија и се дел од пошироката програма за намалување на трошоците што треба да ја подобри ефикасноста на бизнисот, тврдат тие.
Програмата за намалување на трошоците вклучува и оддели на глобалниот логистички гигант DHL, кој вработува околу 600.000 луѓе ширум светот. „Deutsche Post“ е нејзина германска подружница, забележува агенцијата dpa.
Групацијата DHL се обидува да ги намали трошоците и проценува дека програмата ќе им донесе заштеда од повеќе од милијарда евра.
Во 2024 година приходите на групацијата пораснаа за само три отсто, на 84,2 милијарди евра. Оперативната добивка, пак, е намалена за 7,2 отсто, на 5,9 милијарди евра.
Нивните трошоци се зголемија за 2,6 отсто, на 42,8 милијарди евра и беа концентрирани првенствено во глобалниот товарен оддел.
Приходите на одделот за поштенски услуги во Германија, „Post&Parcel Germany“, забележаа речиси ист процентуален раст на приходите, од 2,7 проценти. Но, нивната добивка пред камати и даноци е намалена за 5,6 отсто, на 821 милион евра.
Бројот на писма со години се намалува, а во 2024 година значително е намален и бројот на рекламни флаери, соопштија од компанијата. Светлата точка е поголемиот обем на испорачани пакети.
Одделите за брза испорака и логистички услуги се значително попрофитабилни, но ги трпат негативните последици од падот на економската активност и геополитичките тензии.
Менаџментот на DHL е внимателен во своите прогнози поради „пригушеното макроекономско опкружување“.
„Очекуваме глобалната политичка и економска ситуација да остане нестабилна во 2025 година“, изјави извршниот директор на групацијата DHL, Тобијас Мајер.
Слични новости
Нафтата поскапе кон 71 долар
Цените на нафтата пораснаа до 71 долар на меѓународните пазари во петокот, откако руски функционер навести дека водечките производители би можеле да го преиспитаат планираното зголемување на понудата
Димитриеска Кочоска: Македонската економија веќе не е во стагнација
Веќе почнуваат да се гледаат и видливи се резултатите од нашата работа. Економијата во Македонија повеќе не е во стагнација, оцени министерката за финансии Гордана Димитриеска – Кочоска, осврнувајќи се на податоците што денеска ги објави Државниот завод за статистика за невработеноста, индустриското производство и извозот.
Кинескиот извоз скромни пораснал на почетокот на 2025.
Кинескиот извоз се зголемил само малку во јануари и февруари, додека увозот остро паднал, покажаа во петокот објавените царински податоци, како одраз на влијанието на зголемените трговски тензии со САД и Европската унија