Гвадалахара и Монтереј домаќини на Интерконтиненталните квалификации за СП2026

Националните тимови ќе бидат поделени на два „мини-турнира“ со две полуфиналиња и финале, а само победниците на турнирот ќе се квалификуваат за СП 2026.

„Овие култни стадиони се совршени сцени за она што ветува дека ќе биде возбудлив настан исполнет со страст, драма и возбуда“, објави претседателот на ФИФА, Џани Инфантино.

„Овој плејоф турнир им нуди на навивачите можност да бидат дел од историски натпревари во градови и места пред да започне главниот настан три месеца подоцна низ Канада, Мексико и САД“, додаде тој.

Жрепката за плејоф турнирот ќе се одржи во седиштето на ФИФА во швајцарски Цирих во четврток, заедно со европскиот плејоф.

Во овие мексикански градови ќе се играат натпреварите и за време на Светското првенство. Стадионот „Акрон“ во Гвадалахара ќе биде домаќин на четири натпревари од групната фаза, а стадионот „BBVA“ во Монтереј ќе биде домаќин на три натпревара од групната фаза, како и натпревар од осминафиналето.