На Волстрит, индексот S&P 500 падна четврти ден по ред во вторникот, како и индексот Nasdaq, бидејќи инвеститорите останаа внимателни пред објавувањето на заработката на „Nvidia“ и по извештајот кој покажуваше слабеење на довербата на потрошувачите.
Индексот Dow Jones вчера порасна за 0,37 отсто, на 43.621 поен, но поважниот S&P 500 се лизна за 0,47 отсто, на 5.955 поени, а индексот Nasdaq падна за 1,35 отсто, на 19.026 поени.
Вчера, како и претходниот ден, технолошкиот сектор беше под притисок, при што цената на акцијата на „Nvidia“ падна за речиси 3 отсто пред објавувањето на кварталните резултати во среда.

Реакцијата на инвеститорите на резултатите на најголемиот светски производител на чипови за вештачка интелигенција може значително да влијае на насоката на индексите S&P 500 и Nasdaq, бидејќи опциските договори покажуваат дека цената на „Nvidia“ може да порасне или падне до 8 отсто, во зависност од деловните резултати.
Инвеститорите вчера беа загрижени и од извештајот кој покажува дека довербата на потрошувачите слабее, бидејќи е неизвесно како политиката на американскиот претседател Доналд Трамп ќе влијае на инфлацијата и на целокупната економија. Ова може да доведе и до слабеење на потрошувачката, за што предупредуваат голем број компании, а потрошувачката сочинува околу 70 отсто од американската економија.
Падот на индексот S&P 500 четврти ден по ред, со падот на најниските нивоа за еден месец, е и резултат на стравувањата на инвеститорите од трговска војна, имајќи предвид дека Вашингтон се заканува со царини за речиси сите големи земји во светот.
Покрај тоа, инвеститорите се загрижени за високата инфлација во САД, поради што американската централна банка веројатно нема да продолжи со намалување на каматните стапки толку брзо како што се надеваа инвеститорите.
„Насловите во медиумите се доста драматични, за царините, за слабоста на економијата… Затоа, потрошувачите, а веројатно и деловните луѓе, се двоумат да донесат одлуки и го чекаат развојот на ситуацијата. Исто е и на пазарот на капитал – ова беше уште еден ден на избегнување ризик и вака се тргува речиси еден месец“, вели Питер Туз, претседател во компанијата „Chase Investment Counsel“.
Внимателно вчера беше и тргувањето на европските берзи. Лондонскиот FTSE индекс се зголеми за 0,11 отсто, на 8.668 поени, додека франкфуртски DAX се лизна за 0,07 отсто, на 22.410 поени, а париски CAC за 0,49 отсто, на 8.051 поен.
Слични новости
Европските индекси се во пад поради неизвесноста околу царините на Трамп
Извршниот директор на Голдман Сакс Дејвид Соломон изјави дека лидерите на големите корпорации сакаат економската политика на администрацијата на Трамп да биде појасна, бидејќи како што рече „во моментов нивото на неизвесност е голем“.
Благ пораст на доларот, нафтата поевтини
На валутните пазари вредноста на доларот во однос на кошницата валути благо се зголеми во претпладневото тргување во четвртокот
Волстрит благо порасна, инфлацијата благо се намали
На Волстрит, индексот S&P 500 порасна во средата, по два дена пад, бидејќи инвеститорите беа охрабрени од ублажувањето на инфлацијата во САД, но тргувањето останува претпазливо бидејќи Вашингтон води тарифна војна на повеќе фронтови