Бројот банкроти на компании во Германија за четвртина поголем во 2024.

Ненадејното зголемување на банкротите се претвора во бран и ќе продолжи да го прави во 2025 година, изјави извршниот директор на „Creditreform“, Бернд Буетов. Од компанијата очекуваат дека до крајот на оваа година стечај ќе прогласат вкупно 22.400 фирми, наспроти 17.814 во претходната година. Ова ќе биде највисока бројка од 2015 година, кога 23.100 компании прогласија банкрот.

„Кризите од изминатите години сега ги погодуваат компаниите со одредено временско задоцнување во форма на стечај. Тоа значи дека бројките за стечаите наскоро би можеле да се израмнат со рекордните нивоа од 2009 и 2010 година, кога банкротираа повеќе од 32.000 компании“, рече шефот на економските истражувања во „Creditreform“, Патрик Лудвиг-Ханц.

Во „Creditreform“ веруваат дека „многу динамичниот тренд на прогласувања стечаи“ ќе продолжи барем во првиот квартал од следната година, според Ханц. Тој ја наведе и неподготвеноста на многу компании да инвестираат во услови на многу неизвесна деловна клима, што доведе до дополнително влошување на ситуацијата.

Германскиот осигурител на кредити „Allianz Trade“ очекува и дополнителен раст на бројот на банкроти во Германија во 2025 година.

„Моменталната слаба економска ситуација во Европа, особено во Германија, им создава проблеми на домашните компании“, изјави пред два месеца Мило Богаертс, извршен директор на „Allianz Trade“ во Германија, Австрија и Швајцарија.