ФИФА воведува посебна категорија влезници за мундијалот од 60 долари

Светската фудбалска асоцијација ФИФА во вторникот одговори на критиките за високите цени на влезниците за Светското првенство во 2026 година со воведување нова ценовна категорија од 60 долари, која ќе биде достапна за сите 104 натпревари, вклучувајќи го и финалето.

Влезниците од новосоздадената категорија цени „навивачкото ниво“ ќе им бидат доделени на националните асоцијации за поединечни натпревари во кои ќе играат нивните селекции. Се очекува овие асоцијации да ги стават билетите на располагање на „лојалните навивачи кои имаат блиска врска со своите национални тимови“, се вели во официјалното соопштение.

Овој потег доаѓа откако навивачите беа шокирани и налутени од цените што се движеа од 120 до 265 долари за натпреварите од групната фаза, додека ценовниот опсег за финалето, што ќе се игра на 19-ти јули во Ист Радерфорд, Њу Џерси, е од 4.185 до 8.680 долари.