Туск: Мирот во Украина ќе биде постигнат за неколку седмици

„Кога велам дека мирот е на повидок, зборувам за наредните седмици а не за месеци или години. До јануари, сите треба да се собереме… за да донесеме одлуки за иднината на Украина, за иднината на овој дел од светот“, додаде полскиот премиер.

Туск рече дека безбедносните гаранции што САД му ги нудат на Киев се причина да се надева дека конфликтот наскоро ќе заврши, но и дека Киев ќе мора да се согласи на компромис кога станува збор за губењето територии.

Американскиот претседател Доналд Трамп по разговорите со украинскиот претседател Володимир Зеленски во неделата изјави дека се „сѐ поблиску, можеби и многу блиску“ до договор за завршување на војната, иако сè уште има „чувствителни прашања“.

Зеленски рече дека прашањето за контролата врз нуклеарната централа Запорожје, која е во руски раце уште од почетокот на војната, сè уште не е решено, како и судбината на Донбас во источна Украина, што е во спротивност со она што го тврди Трамп и американските преговарачи.

Русија сака Киев да се повлече од малите рабни но клучни за украинската одбрана утврдени населби од регионот Доњецк кои сѐ уште ги контролира Украина. Киев, исто така, сака борбите да престанат додека се водат преговори по сегашните линии на фронтот, а Вашингтон предлага своевидна зона на слободна трговија доколку украинските трупи се повлечат. Москва, пак, е истрајна на своето барање за целосно повлекување на украинските трупи од историската област Донбас.