Силно поскапе транспортот на течен природен гас преку Атлантикот

Во вторникот цените за возарината на атлантската рута за пловилата со капацитет од 174.000 кубни метри ТПГ беа 61.500 долари дневно, покажаа податоците од агенцијата за проценка на цените „Spark Commodities’.

Во понеделникот тие накратко достигнаа 61.750 долари, нивното највисоко ниво од август 2024 година. Тоа значи дека пораснале за повеќе од 50 отсто од претходниот понеделник.

На пацифичката рута, пак, цените на превозот за истата класа пловила се зголемија за речиси една третина во понеделникот во споредба со почетокот на минатата седмица, достигнувајќи 42.250 долари дневно, што е највисоко ниво од крајот на јуни, покажаа податоците на агенцијата.

Скокот на цените на превозот беше поттикнат, меѓу другото, од доцнењата во истоварувањето на течен природен гас во египетските пристаништа, што индиректно влијаеше и на маршрутите на бродовите, објаснува Стивен Гордон, експерт во компанијата за собирање и анализа на податоците за пловидбите „Clarksons Research“.

Цените на превозот беа зголемени и од сезонското зголемување на побарувачката за течен природен гас пред зимата во Европа и во Јапонија.

„Комуналните претпријатија и трговците складираат залихи пред постудените месеци“, изјави за Reuters брокер за бродски превоз.

Покрај зголемените испораки од САД во Азија, со оглед на честите патувања до источните дестинации и подолгите пловидби, цените се зголемени и од проширувањето на одредени извозни проекти од САД, според Гордон.

„Се чини дека бродовите се помалку достапни на краток рок и малкумина можат да ги исполнат роковите за испорака во ноември на атлантската рута, а овие ограничувања на капацитетот би можеле да го поддржат растот на цените на краток рок и во наредниот период“, забележува аналитичарот на „Clarksons Research“.