Арсенал се одржа на врвот по дербито со Астон Вила

Манчестер Јунајтед повторно ги разочара своите навивачи играјќи само 1:1 против „фенерџиите“ Вулверхемптон, кои го освоија само третиот бод оваа сезона. Јунајтед поведе во 27. минута со голот на Џошуа Зиркзи, а Ладислав Крејчи израмни во 45. минута. Во судиското продолжение, Јунајтед уште еднаш ја затресе мрежата на противникот, но голот на Патрик Доргу беше поништен поради бекфилдот.

Челзи и Борнмут одиграа 2:2, а сите четири гола беа постигнати во првиот половина час од натпреварот. На Борнмут му беа потребни шест минути да го шокира Челзи кога Дејвид Брукс погоди за водството. Кол Палмер израмни од пенал во 15. минута, а Енцо Фернандез го сврти резултатот во 23. минута. Сепак, само четири минути подоцна, Џастин Клајверт израмни за гостите. Со овој резултат, лондонскиот тим ја продолжи кризата, во последните седум лигашки натпревари, „Сините“ остварија само една победа.

Натпреварот помеѓу Вест Хем и Брајтон заврши со идентичен резултат. Стрелци за домаќините беа Џарод Бовен (10) и Лукас Пакета (45+4-11м), а за гостите Дени Велбек (32-11м) и Џоел Велтман (61). Велбек имаше шанса да постигне гол од пенал во 36-тата минута, но ја погоди пречката.

Њукасл Јунајтед го победи Барнли со 3:1 на гости, а Евертон исто така освои бодови на гостински терен со победа од 2:0 против Нотингем Форест.

Нема натпревари во среда, а колото завршува на првиот ден од јануари кога ќе играат Кристал Палас – Фулам, Ливерпул – Лидс Јунајтед, Брентфорд – Тотенхем и Сандерленд – Манчестер Сити.

Арсенал сега води со 45 бода, Манчестер Сити има пет бода помалку, но и натпревар помалку, додека Астон Вила е трета со 39 бода.